LIZARTZA 1. ORAIN ARTEKO ESPLORAZIOAREN LABURPENA

Ubaoko (Urzulo) esplorazioan urteak eman ondoren (oraindik esplorazioak aurrera jarraitzen du), Lizartza 1 leizean dihardugu azken bi urteetan. Hau dela eta, orain arte egindako lanen laburpen txiki bat idaztea erabaki dugu hemendik aurrerakoak errazago ulertu ahal izateko:

2002. urteko irailean aurkitu genuen koba eta urte horretan bertan esploratu zen lehen aldiz. Zenbait galeria topografiatu ziren eta -50 metroko sakonera arte esploratu zen, leku estu batean esplorazioa bertan behera utziz. Horrela jaso zen egun horretako irteera txostenean: “… al fondo como llovio abundantemente se mojaron en el pozo final llenandoseles la katiuskas de agua. El fondo se estrecho mucho”.

2002. urtea. Lehen esplorazioa.

2016. urtean zenbait saiakeraren ondoren, eta ingurua elurrez estaltzen zuen egun bat aprobetxatuz, Lizartza 1 berriro lokalizatzea lortu genuen. Zuloa guztiz estalita zegoen eta berriro ireki ondoren esplorazio fase berri bati ekin genion.

2016. Sarrera Ikusi ere ez zen egiten, haize korronteari esker lokalizatu zen berriro.

2017. urteko udaberrian lehenengo emaitzak jaso genituen: Goiko galerian estugune bat zeharkatu eta galeria berriak agertu ziren. Hauek topografiatu eta punturik sakoneneko estugunea errebisatzera joan ginenean hartu genuen ezustekorik handiena: Hau zeharkatu eta errekasto batekin topo egin genuen, gerora, “Misisipi” moduan bataiatua izango zena.

2018. Atxuriko miñatik sarrera berria.

Hortik aurrera, behera eta behera etengabe! 100, 200, 300 eta azkenik 400 metroko sakonerara heldu arte. Momentuz; leizeak beheraka jarraitzen bait du! Denok Lizartza eta Gesaltza-Arrikrutz sistema elkartzea dugu buruan. Gero eta gertuago gaude amets horretatik…

Bitartean, 2018an, sarrera berri bat aurkitu diogu kobari. Zenbait saiakeraren ondoren Atxuriko miña zaharreko galeria batetik Lizartzarekin elkartzen gaituen bidea aurkitu dugu. Haize korronteari jarraituz, meatzariek harriz betetako galeria natural bat hustu behar izan dugu horretarako. Sarrera berri honetatik -280 metroko sakonerara heltzen gara Lizartza 1era. Bide erosoago batetik. Hau izango da, hemendik aurrera, esploratzen jarraitzeko erabiliko dugun sarrera.

Eta orain zer? Ba orain, Lizartzan 280 metroko sakoneratik gora jarrita dugun material guztia berreskuratzeko asmoa dugu. Asko bait da bertan “inbertitu” dugun materiala. Soka, mosketoi, plaka, … horien beharra dugu beherakako bideari ekiteko. Lan nekeza baina egin beharrekoa. Gogotsu gaude!