LIZARTZA 1: "PUNTAN" BERRIRO!

2018-07-25, Asteazkena.                                         

Lizartzako puntako esplorazioari ekin diogu berriro egun hauetan. Denbora pasa da “puntan” egon ginen azken alditik (2017-11-25). Hilabete hauetan goiko aldea desekipatu dugu, argazkiak atera eta Atxurin errekan gora esploratu eta topografiatu dugu baina bada garaia beheraka jarraitzeko.

Eguna lokalean hasi dugu; 9tan. Aurreko egunetik prestatutako materiala jaso, azkeneko prestaketak egin eta Kortakogañera abiatu gara. Zerbait jan, jantzi eta Oñatiko baserritar batekin berriketa egin dugu. Harritu gaitu honek gure esplorazioen berri izatea. Hala ere, bere aurpegia ikusita, bera gehiago harritu da hor barruan zer dagoen kontatu diogunean. (Ez dugu sartzeko oso “animoso” ikusi ...).  

11:30 aldera martxan!! 2 bat ordu beharko ditugu Lizartza 1 eta Atxuriko minako loturara heltzeko. Tartean meandro estuak eta 5 jauzi bertikal. Hemendik “puntura”  beste horrenbeste. Gaur denbora gehiago beharko dugu -350m sakonerako putzuko instalazioa aldatu behar dugu eta. Bide batez, -280m eta -350m bitarteko topografian konprobazio batzuk egingo ditugu baita.

Azkenean heldu gara jaitsi gabe utzi genuen 8 metroko putzura (-400m). “Instalazio eskasa dauka honek!”, komentarioa. Harri garbirik ez eta tentuz egin beharrekoa.

Hemendik aurrera gozamena!! Galeria zabal bat!! Handia eta ederra!! Eta guretzako garrantzitsuena: aurrera jarraitzen duena! Badirudi erreka azpian desagertzen dela, harri bloke artean. Ondo etorriko zaigu uretatik apur bat irtetea. Haizea ere ez da hainbeste nabari. Galeria bitan banantzen da. Alde batera, ur gardeneko sifoi bat. Hain dago garbia ura, azpiko lurra bertan dagoela dirudiela, baina izango ditu metro batzuk sakoneran. Goitik jarraitzen du galeriak. 8 bat metrotako “pasamanos”  batekin errez egingo dugu aurrera sifoi gainetik. Beste galerian, marmita handi bat, 7 bat metroko diametrokoa. Sakona. Kasu honetan ere goiko erlaitzetatik  igaro beharrekoa. Kobak beste itxura bat du orain. Beste koba bat dirudi!

Tamalez, kanpoan dauden taldekideekin adostu dugun irteera ordua gañean dugu. Bueltako bideari ekin behar diogu. Baditugu ordu batzuk aurretik. Bost bat gelditzen ez bagara... Zerbait jan eta gora!

04:00tan kanpoan.